Vieiros

Os prexuízos medioambientais que están a provocar as plantacións de eucalipto en réxime intensivista fanse cada vez máis evidentes. As técnicas utilizadas por NORFOR para preparar o terreo e establecer a plantación implican unha forte agresión ao solo ao levantar e inverter o seu perfil con maquinaria pesada, en sucos a favor da pendente, deixándoo exposto á acción da erosión o que, coa chegada das chuvias, significa o seu arrastre cara á rede de drenaxe fluvial; neste caso, a forte pendente das ladeiras dos montes onde se está a realizar a plantación denunciada é un factor de risco engadido que favorece a eliminación dos materiais que formaron parte do solo.

Os destrozos na zona, implican a desaparición da vexetación natural existente antes da realización da plantación. A eliminación do solo por erosión supón tamén a desaparición da vexetación a el asociada e a substitución por outra adaptada ás novas condicións de regresión. Por outro lado, a medida que as árbores medren, é practica habitual en NORFOR a eliminación da vexetación que compite cos eucaliptos con herbicidas, en tratamentos que sole aplicar cada dous anos, co que esta acabará por desaparecer totalmente.

A denuncia e solicitude de intervención da Consellería do Medio Rural que a Asemblea do Suído e a Asociación pola defensa da Ría veñen de presentar, refírese a unha plantación de eucaliptos que a empresa NORFOR está a realizar no Concello de Covelo, probablemente dentro do ecosistema que o goberno galego ten decidido incluír na rede NATURA 2000, a Serra do Suído, con límites aínda por establecer. A plantación afecta a unha área que se aproxima aos 500.000 metros cadrados e ten producido graves danos no ecosistema existente e destrozos que están a disparar os procesos erosivos e que están a transformar as características físicas e biolóxicas nunha zona de grande valor ambiental, iniciando un proceso de regresión que se faría máis profunda a medida que medrasen as árbores da plantación.

Con esta denuncia, a Asemblea do Suído e a Asociación pola defensa da Ría queren facer unha chamada a Administración e á cidadanía para que se mobilicen na defensa do escaso patrimonio natural que ten sobrevivido á unha política forestal imprudente e irresponsable e na defensa dos nosos montes como fonte de usos e servizos ás comunidades e á sociedade en xeral evitando as prácticas que destrúen irreversiblemente os recursos básicos dos sistemas forestais: o solo e a biodiversidade.

É necesario destacar que NORFOR posúe dúas certificacións “verdes” a do PEFC e a do FSC (Consello de Manexo Forestal), o que ven a demostrar que estes selos de suposta xestión forestal sostible non son en realidade máis que instrumentos maquillaxe ao servizo das empresas que ocultan a realidade das peores e máis destrutivas actividades forestais coma os monocultivos de eucalipto con forte impacto ambiental que xestiona NORFOR.