Vieiros

"Demostraron moitos psicólogos, moitos psiquiatras, que non hai relación entre celibato e pedofilia", afirmou o secretario de Estado do Vaticano, Tarcisio Bertone, na súa intervención na 99ª asemblea da Conferencia Episcopal de Chile, "pero moitos outros demostraron, e dixéronme recentemente, que hai relación entre homosexualidade e pedofilia". Así se despachou o alto cargo do Vaticano diante dos cregos chilenos, en referencia aos escándalos por abusos sexuais a cativos que en todo o mundo veñen saíndo á luz nos últimos tempos no ámbito da Igrexa católica.

As palabras de Bertone axiña causaron reacción desde o Movemento de Integración e Liberación Homosexual de Chile (Movilh), desde onde o seu voceiro, Rolando Jiménez, reprochou a estratexia das xerarquías católicas de tratar de escapar da "responsabilidade política, ética e xudicial" que os envolve no "encubrimento de sacerdotes pedófilos". "O de hoxe é asqueroso, sinistro, de parte dunha personaxe da envergadura de Bertone", censurou.

Para ampliar:

• BBC Mundo: O Vaticano relaciona a pederastia coa homosexualidade
• El Mercurio: Bertone: expertos demostraron "relación entre homosexualidade e pedofilia